ÜN VIADI E 4 SERVEZZANS

Il project «Ün viadi e 4 servezzans», naschì en la Svizra taliana e realisà grazia a las cumpetenzas multifaras da differents partenaris da l’entira Svizra, porscha in lieu d’inscunter per lingua e cultura per las regiuns linguisticas da noss pajais. Il project na cumpiglia betg mo in cudesch cun cumparegliaziuns da locuziuns en las quatter linguas naziunalas, mabain era material didactic per las scolas (fegls da lavur per l’instrucziun da talian) e cuntegns interactivs per in public general.

Sch’insatge na pertutga betg nus, discur jau da giabus («Non sono cavoli nostri»), ils cussegliers federals Berset e Parmelin da tschagulas («C’est pas nos oignons»), entant che las cusseglieras federalas Amherd, Keller-Sutter e Sommaruga sco er il cusseglier federal Maurer fan allusiun a la gervosa («Das ist nicht unser Bier»). Grazia a quest cudesch emprendain nus ch’ins recurra per rumantsch (vallader) a l’amulain en talas situaziuns! Per chapir in l’auter dovri damai ina buna purziun mirveglias ed in «pizzico d’amore» per las autras linguas! Buna lectura: ella vala la paina!

Ignazio Cassis

Cusseglier federal, schef dal Departament federal d’affars exteriurs

L’IDEA

L’idea per il project è naschida a chaschun da differentas ediziuns da l’uschenumnada «Settimana della Svizzera italiana», sviluppada da Nicole Bandion e realisada da l’Università della Svizzera italiana (USI) fin uss en ils chantuns VS, AR, BS, LU, BE, JU, FR e ZG. In grond engraziament va a las scolas, a la magistraglia, a las classas ed als chantuns che han fatg part cun entusiassem da las «Settimane».
Las iniziativas per promover la lingua taliana vegnan cuntinuadas en avegnir sut la batgetta dal Departament da l’educaziun, da la cultura e dal sport dal chantun Tessin.